ويتواصل مسلسل التًحرًش
المتحرش اللي بعدو
من قناة الحوار ننتقلوا الى قناة حنبعل ...نقصد حنبعل بادارتها القديمة وقتها كانت على ملك العربي نصرة ...هيا سيدي هيا للا ..اني قاعدة على روحي وتكلمني صديقة قتلي ايجا للبلاصة الفلانية راهو ثمة كاستينغ ..مشيت نلقى اغلب الوجوه نعرفهم ...الناس الكل فرحانة ..واخيرا اتذكرونا احنا بنات المعهد العالي للفن المسرحي...قعدنا الكل في قاعة الانتظار وبدينا ندخلوا بالوحدة بالوحدة نعديوا في الكاستينغ ...تقريبا الكلنا بنات خاطر المسلسل وقتها سجن بريكة ..عديت الكاستينغ تقبلت في دور باهي..خذيت نصي وكنتراتويا وروحت..مشيت صححت الكنتراتو وعدينا ايامات ماشين جايين على شركة الانتاج ..مرة نقيسوا في الدبش ..مرة نقراوا في النص...لين نهار كلموني الادارة قالولي ايجا اكيد..مشيت نجري ووقتها وصلني خطيبي السابق وقعد يستنى فيا اللوطا ..دخلت للشركة لقيتها تقريبا فارغة تبمبي..فيها طفلة تخدم كاتبة دخلتني للمنتج اللي هو المهدي نصرة ولد العربي نصرة..وصاها باش ماتدخل علينا حد..على فكرة الطفلة نعرفها اما مش باش نسميها خاطر عادي تخرج تحلف بيمين لا تعرفني ولاعمرها خدمت غادي هههه..قعدت عالكرسي ..غزرلي قالي شكون اللي وصلك...قتلو راهو خطيبي ويستنى فيا ..قالي شفتو مالشباك !!!..قتلو لاباس اش ثمة علاش عيطتلي..قام يضحك...قالي بطل منو خطيبك..انت طوا مصححة معانا عقد احتكار 5 سنين ..(واحنا بالرسمي اغلبنا وقتها كالبهالل صححنا عقد الاحتكار وزيد ثمة خطية 100 الف دينار اذا الممثل غاب والا عمل حاجة ماتعجبش المنتج)...اني وقتها كيف جبدلي على العقد مخي تشوشط وفقت اللي اني عملت غلطة عمري..غزرلي قالي قول لخطيبك يروح خاطر باش نمشيوا نتعشاوا مع بعضنا ..قتلو لا مانجم نمشي معاك لحتى بلاصة ...قالي مالا طانكلم مطعم يبعثلنا العشاء هنا..قتلو راني ماانجمش وراني كان نزيد نبطى خطيبي ينجم يجي يعملي مشكلة ..بدى يقنع فيا باش نبطل من خطيبي وباش يحلي في الجنة ذراع وباش يعملي برنامج ثقافي دوب مايوفا المسلسل وباش وباش وباش..مباعد قالي راك تجي منكان زادة ..نتخيل فيك في مايو ..قتلو لا راني مانجيش مانكان ..قالي انا منتج ونعرف...ههههه.الحاصل نهارتها عملت روحي فرحانة اللي هو باش يردني النجمة الاولى في تونس ..وقتلو خلي نمشي وطانرجعلك مرة اخرى ...قالي ترجعلي وحدك بلاش خطيبك..قتلو اكيد وخرجت...من غدوة عالصباح طلبوني الشركة ..اللي يعجكم فيه منظم ..مايكلمنيش هو ..يقول للي يخدموا معاه يكلموني باش يظهر بروفيسيونال ..قالولي ايجا اكيد المنتج حاجتو بيك...مشيت دخلت ...قالي ليلة كاملة نخمم فيك ..انت نتاعي طوا ..انت تستاهل اكثر مالدور اللي خذيتو في سجن بريكة ..عندي ليك دور ماخير...وقتها مازالوا يكتبوا في مسلسل نجوم الليل ..هز التاليفون وكلم ندرى شكون قاللهم عيطولي حد ماللي يكتبوا..جات وقتها مرى اسمها سامية..قعدت بجنبي..قاللها احكيلها عالادوار خلي تختار..قعدت سامية تحكيلي واني باهتة ..كملت سامية حكاتلي شكرها وقاللها برا لبيروك..هي خرجت وهو قام من كرسيه ووقف ورايا ..اني عاطيتو بضهري قاعدة عالكرسي وهو لصق للكرسي ..قالي باش نبدلك اللوك وندرى شنية..نسيت اش يحكي خاطر وقتها اني دخلت بعضي ومش عارفة اش نعمل..حط يدو على راسي ...قمت نجري من كرسيا وقتلو لازم نمشي..قالي ماعاد عندك وين تمشي..انا نقرر وقتاه تمشي ووقتاه تجي ..انت مصححة معايا عقد و كان ماتاخوش الكلام نحطك في الحبس..وماتعرفنيش شكون....بعدت عليه وحاولت نهدي روحي وقتلو اي نعرف اما طوا لازم نمشي وماناش هاربين على بعضنا وخرجت..خرجت نجري مالشركة ..مباعد وقفت البرا يجي درجين نرعش..رجعت للشركة سالت طفلة تخدم غادي..قلتلها اناهو بيرو المخرج..مشيت للمخرج نرعش..حكيتلو اللي صار وقتلو ماتنجم تمنعني منو كان انت ..راني مصححة عقد وراهو يبتز فيا ..قتلو انت المخرج وانت اللي تنجم تقلو ماحاجتيش باها ومانيش مقتنع بيها في الدور..المخرج راجل محترم برشا وشاب متربي عالاخر اسمو برهان بن حسونة....قالي اتهنى و قطعو الكنتراتو وبرا روح ورد بالك على روحك..راهو دومان صعيب..وكان تجيني خدمة في بلاصة اخرى طانكلمك ...شكرتو وخرجت ...صدقوني نجري في الدروج ونبكي بالفرحة والقهرة في نفس الوقت ...واتخيلوني اش حسيت واني نتفرج في المسلسل وفي دوري اللي كنت باش نخدمو وبديت نحفظ في نصو وفرحانة بيه...
بعد سنوات تقابلت مع برهان بن حسونة..قتلو نحب نشكرك عاللي عملتو معايا..قالي صدقني نسيت ..عاودت ذكرتو باللي صار ..قالي من كثرة الغرايب في هالدومان ماعادش نتذكر...على فكرة برهان من احسن المخرجين في تونس ..اما قليل شكون يعرفو ..خاطر هو بيدو نظيف ومتربي وصعيب كان ينجم يتفاهم مع المنتجين الخماج...اخر مرة سالت عليه قالي الاكثرية يخدم في الخارج. ويتعامل مع قنوات اجنبية ...
راهم برشا بنات ...برشااا..تحرش بيهم المهدي نصرة ..وراني نعرفهم ونعرف اغلب حكاياتهم..ونعرف وحدة منهم حاول يغتصبها وشكات بيه ووصلوا للمحاكم وخرج منها كالشعرة مالعجين...امان اتكلموا ...اتكلموا يزينا مااسكتنا...
#أنا_زادة
إرسال تعليق